Foirm chuardtha

GÉNESIS 40

Muscuicuna imata nisha nishcata

José huillashcamanta

1Chai quipami Egipto llactata jatun mandacman vinota servicpish, tandata ruhuacpish Egipto llactata jatun mandacta mana allita ruhuashpa piñachirca. 2Chaimantami Faraonca vinota serviccunata mandac-huanpish, tandata ruhuaccunata mandac-huanpish piñarirca. 3Shina piñarishpami soldadocunata mandacpac huasipi prezu churarca. Chaillapitacmi Josepish prezu carca. 4Soldadocunata mandacca Josemanmi chai serviccunata ricuchun mingarca.

Paicunaca tauca punzhacunatami carcelpi carca.

5Shuc tutami carcelpi cac vinota servicpish, tandata ruhuacpish chican chicanta muscurcac. Chai muscushcacunaca paicuna quiquinllatac ima tucuna cashcatami huillacurca. 6Tutamanta paicunapacman José chayamushpaca, llaquilla tiyacushcatami ricurca. 7Chaimantami paipac amopac huasipi prezu tiyacuc Faraonta serviccunataca:

—Cunanca, ¿ima nishpatac llaquilla ñahuicuna tiyacunguichic?— nirca.

8Shina nicpimi paicunaca:

—Shuc muscuitami charircanchic, chai muscui imata nisha nicushcataca pi mana huillac tiyanchu— nirca.

Shina nicpimi Joseca:

—Cai muscui imata nisha nicushcataca Diosllami huillanga. Imata muscushcata parlaichic— nirca.

9Shina nicpimi, vinota serviccunata mandacca:

—Ñucaca shuc uvas yuratami ñuca ñaupapi shayacucta ricurcani. 10Chai yurapica quimsa ramami tiyarca. Chai ramacunaca sisashpami, sumac pucushca uvas huayungahuan ñapish ricurirca. 11Ñucaca Faraón ubiana vasopi uvasta capishpa, Faraonpac maquipi churacushcarcani— nirca.

12Shina nicpimi Joseca:

—Can muscushca quimsa ramaca, quimsa punzhatami nisha nin. 13Quimsa punzha quipami Faraonca carcelmanta llucchishpa, cutinllatac Faraonman ima ruhuanata ruhuacushcallapitac churanga. Chaipimi canca utcapi ima shina Faraonman vinota servic cashca shinallatac servingui. 14Can alli cashpa, ñucata llaquishpa, Faraonman ñucamanta parlangui. Shina parlashpa, ñucata cai carcelmanta llucchingui. 15Ñucataca hebreocunapac llactamantami shuhuashpa pushamurca. Ñuca carcelpi cangapacca, ima millaita mana ruhuashcanichu— nirca.

16Chai muscui imata nisha nishcata José alli huillacpimi, tandata ruhuaccunata mandacca:

—Ñucaca quimsa yuranlla taza tanda uma jahuapi cashcatami muscurcani. 17Chai ashtahuan jahuaman cac tazapica Faraonman ruhuashca tucuilaya sumac tandacunatami volac animalcuna shamushpa, ñuca uma jahuallapitac micurca— nirca.

18Shina nicpimi Joseca:

—Can muscushca quimsa tazaca, quimsa punzhatami nisha nin. 19Quimsa punzha quipami jatun mandac Faraonca sipina yurapi huarcushpa huañuchinga. Chaipimi cambac aichataca volac animalcuna shamushpa micunga— nirca.

20Quimsa punzha quipaca jatun mandac Faraonpac huacharishca punzha pactacpimi, jatun mandacca tucui paita serviccunaman jatun micuita caracurca. Chai serviccunapac ñaupapimi, vinota serviccunata mandacta, shinallatac tandata ruhuaccunata mandacta carcelmanta llucchimuchun cacharca. 21Vinota serviccunata mandacca cutinllatac utcaman ruhuana cashcallapitac churacpimi, cutinllatac Faraonman vino vasota cui callarirca. 22Ashtahuanpish tandata ruhuaccunata mandactaca José nishca shinallatacmi sipina yurapi huarcuchun cacharca. 23Shina tucucpipish, vinota serviccunata mandacca Josetaca mana yuyarishpa cungarircallami.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index