Foirm chuardtha

ÉXODO 16

Dios maná shuti tandata carashcamanta

1Israelcunaca tucui tandanacushpami, Elimmanta llucshishpaca, Sin shitashca pambaman chayarca. Chaica Elimhuan, Sinaihuan tupanacuipimi carca. Chaimanca Egiptomanta llucshishcamanta quilla chunga pichca punzhapimi chayarca. 2Tucui tandanacushca israelcuna shitashca pambapi cashpaca Moisestapish, Aarontapish piñashpa rimarircacunami.

3Paicuna rimarishpaca:

—¡Mandac Dios, cai tucui gentecunata cai shitashca pambaman apamushpa, huañuchinapac randica, Egiptollapitac huañuchishca cashpachari alli canman carca! Chaipica aicha mangacunahuan tiyarishpami, huicsa pactata micuc carcanchic— nirca.

4Shina nicpimi, Mandac Diosca Moisestaca:

—Israelcuna ñuca mandashcata cazushcata, mana cazushcata ricungapacca, jahua pachamantami tandata tamyachigrini. Paicunaca punzhantami micuna pactallata pallana can. 5Ashtahuanpish suctaniqui punzhapica, punzha pallanamanta chaupi yallitami pallana can— nirca.

6Chaimantami Moisespish, Aaronpish israelcunata rimashpaca:

—Chishiyanatami Mandac Dios Egiptomanta llucchimushcataca ricunguichic. 7Tutamantaca Mandac Diospac podertami ricunguichic. Mandac Diosca cancuna rimarishcataca uyashcami. Cancunaca ñucanchic pi cashcata mana yachashpami, chashna rimaricunguichic— nirca.

8Moisés ashtahuan rimashpaca:

—Cunan chishica aichata, caya tutamantaca tandatami huicsa pactata micuchun cunga. Mandac Diosca cancuna huashalla rimashcata uyashcami. Chashnaca mana ñucanchictachu rimashcanguichic, ashtahuanpish Mandac Diostami rimashcanguichic. Ñucanchicca, ¿pitac canchicyari?— nirca.

9Chaimantami Moisesca Aarontaca:

—Tucui tandanacushca israelcunataca: “Mandac Diospac cuchuman cuchuyaichic. Paica cancuna rimashcata uyashcami” ningui— nirca.

10Tucui tandanacushca israelcunata Aarón rimacucpimi, paicunaca shitashca pambata chaparca. Chaipica Mandac Diospac sumaimana achicmi puyupi cungailla ricurirca. 11Mandac Diosca Moisestaca:

12—Ñucaca israelcuna rimarishcata uyarcanimi. Chaimanta paicunataca: “Cunan chishica aichata, tutamantaca tandatami huicsa pactata micunguichic. Chashnami ñucataca cancunata Mandac Dios cashcata yachanguichic” ninmi ningui— nirca.

13Chishitaca codorniz animalcuna shamushpami, carpa huasicunata taparca. Cutin tutamantaca jamchi tamyami carpa huasi muyundita urmarca. 14Jamchi tamya pasaricpica, shitashca pambapica rundu shina, ñuto nuyuclla murucunami ricurirca. 15Israelcuna chaita ricushpa, caishuc chaishuc tapunacushpaca:

—¿Imatac caica?— nircacuna.

Paicunaca mana yachashcamantami chashna tapunacurca.

Chaimantami Moisesca:

—Caica, cancuna micuchun, Mandac Dios cushca micunami. 16Caica, Mandac Dios cachashcami. Caitaca tucui mashna micuna pactallata pallanguichic. Carpa huasipi mashna cashcata ricushpa, cada shuc, shuc gomerta pallanguichic— nirca.

17Moisés nishca shinallatacmi israelcunaca shuccunaca yallita, shuccunaca ashallata pallarca. 18Gomer jundatami medishpa, cada shucman pallarca. Achcata pallacpish mana puchuchircachu, shinallatac ashallata pallacpish mana faltachircachu. Cada shucmi micuna pactallata pallarca. 19Moisesca paicunataca:

—Pipish puchutaca cayandipac ama huacaichichun— nirca.

20Ashtahuanpish maijanca Moisés nishcata mana cazushpami, puchuta cayandipac huacaichirca. Shina huacaichicpica, ashnacyashpa, curu jundashcami pacarishca carca. Chaimantami Moisesca paicunahuan piñarirca. 21Micungapac pactashcallatami tucui tutamanta pallangapac llucshic carcacuna. Inti llucshishpa cunuchicpica, tucui nuyucmi carca. 22Suctaniqui punzhapica ishcai gomer jundatami cada shucman pallarca. Chaitami maijan pushaccunaca Moisesman huillangapac shamurca. 23Shina huillacpimi Moisesca:

—Mandac Diosca: “Cayaca Mandac Dios ñucapaclla chicanyachishca samana punzhami. Cusana tiyacpica, cunanllatac cusaichic. Imapish puchushcataca cayandipac huacaichichiclla” ninmi— nirca.

24Moisés mandashca shinallatacmi paicunaca puchushcata huacaichirca. Shina huacaichicpipish cayandi ricucpica, mana curushca, mana ashnacucchu pacarishca carca. 25Chaimantami Moisesca:

—Cunanca, Mandac Diospaclla chicanyachishca samana punzhami, chaimanta micuichiclla. Cunanca imapish pambapica mana tiyangachu. 26Sucta punzhacamanmi pallai pudinguichic, ashtahuanpish canchisniqui punzhaca samana punzhami. Chai punzhapica imatapish mana taringuichicchu— nirca.

27Maijancunaca samana punzhapipish pallangapac llucshircami. Shina cashpapish, imata mana tarircachu. 28Chaimantami Mandac Diosca:

—¿Ima horascamantac ñuca mandashcacunata, nishcacunataca mana cazunguichic? 29Riquichic, samana punzhataca ñuca Mandac Diosmi curcani. Chaimantami suctaniqui punzhapica ishcai punzhapac micunata curcani. Canchisniqui punzhapica pipish huasimanta mana llucshishpami, maipi tiyacushcallapitac saquirina canguichic— nirca.

30Shinami israelcunaca canchisniqui punzhapica samarirca.

31Chai tandataca israelcunaca maná nishpami shutichirca. Chaica culantro muyu shina, yuracmi carca. Shinallatac abeja mishquita churashca galleta shina mishquimi carca. 32Moisesca:

—Mandac Diosca: “Ñuca Egipto llactamanta llucchishpa, shitashca pambapi carashca tandata shuc gomer jundata pallashpa, cancunapac huahua huahuacuna ricuchun huacaichichic” nishpami mandarca— nirca.

33Moisesca Aarontaca:

—Quipa huiñaicunaman shuc gomer junda tandata puñupi pallashpa, Mandac Diospac ñaupapi huacaichichic— nirca.

34Aaronca Mandac Dios Moisesta mandashca shinallatacmi tandataca Mandac Dios mandashcata huacaichina cajón ñaupapi huacaichirca.

35Israelcuna causana llactaman chayangacamanmi chuscu chunga huatata maná shuti tandata micurca. Chaica Canaán llactaman yaicungacamanmi micurca. 36Gomer nishcaca efata chungapi chaupishcami.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index