Foirm chuardtha

Ageini 17

Akepo en Gianena me Isikan

1Kakame do Aburam oromo kede mwakini ot kanyangon kiwie kanyangon (99), Rwot bin oko nyutere bute di oko waco ne be, “Ango en Rubanga Won Twer; bed i nyima abongo raco moro. 2Di ango ako bino timo isikan na kedi, doko ako bino mino ikwae ni bedo tot twatwal.” 3Di do Aburam oko riebere piny, di Rubanga oko waco ne be, 4“Neni, man en isikan kame ango atie timo kedi: in ibino bedo kwaru me atekerin kame tot twatwal. 5- Nyingi likame doko bino bedo Aburam,e do ebino bedo Aburaam:g pien ango atieko mini ibedo kwaru me atekerin atot. 6Abino mino ikwae ni nyai twatwal di ako bino mino gi kidoko atekerin, doko abakai bino wok kibut gi. 7- Ango abino timo isikan na kame bedo nakanaka kedi, karacel kede ikwae ni me kare me anyim, naparo lwak gin lung, pi ango bedo Rubanga ni kede me ikwae ni me kare me anyim. 8- Doko lobo kame nataman in ibedo iye bala ngakumbor no, lobo me Kanan lung, ango abino mino buti, in karacel kede ikwae ni me kare me anyim, me bedo mergi nakanaka; doko ango abino bedo Rubanga gin.”

9Rubanga bobo oko waco ne Aburaam be, “Aso, ida miero ilub kop me isikan na kedi, in karacel kede ikwae ni me kare me anyim, naparo lwak gi lung. 10- Isikan nango kame ibinunu lubo, kame tie i dierediere nango kedi, karacel kede ikwae ni en ine: cuo dedede kame tie i komu kobino kepo. 11Ibinunu kepo delkomu me cuo, di eko bino bedo gianena me isikan na kede wu. 12Pi kare lung cako nataman, in karacel kede ikwae ni ibinunu kepo idwe awobe dedede kame tie i komu ka kiromo ceng kanyauni, kiton ipasoi kame konywalo i miere wu kede kame iwilunu kede sente kibut jokumbor. 13Miero kep ipasoi kame konywalo imiere wu kede kame iwilunu kede sente. Manono bino bedo gianyuto i delkomu be isikan na kede wu en isikan kame bedo nakanaka. 14Icuo kalikame kokepo delkome me cuo kobino poke tenge kikom jo mege, piento udo en etieko turo isikan na.”

15Rubanga bobo oko waco ne Aburaam be, “I kom kop kame mako dako ni Sarai, likame in bobo ibino lwonge be Sarai, do nyinge bino bedo do Sara. 16Ango abino mine winyo, doko medo i wi manono ango abino mini inywalo atin awobi kede en. Abino mine winyo di en eko bino doko toto me atekerin; abakai me atekerin bino wok kibute.”

17Di do Aburaam bobo oko riebere piny di eko nyero, eko penyere kene be, “Icuo me mwakini tol acel da karuno pwodi nywalo atin? Sara da ngat kame tie nataman kede mwakini ot kanyangon pwodi karuno nywalo atin?” 18Di Aburaam oko waco ne Rubanga be, “Ango akwao be Isimael bed kuo i nyimi!” 19Rubanga oko dwoko be, “Likame kamano, do Sara dako nin en kame bino nywalo ni atin awobi, di in iko bino cako nyinge Isaka.i Ango abino timo isikan na kede en tetekeny ebed isikan kame bedo nakanaka but ikwae mege me kare me anyim. 20I kom kop kame mako Isimael, ango atieko winyo kwac ni; ango abino mine winyo doko abino mine enywal di ikwae mege ko bedo tot twatwal; ebino nywalo jopug tomon kiwie are, doko ango abino mino ateker adwong wok kibute. 21Do ango abino timo isikan na kede Isaka, ngat kame Sara bino nywalo nin i kare kame cal bala nataman i mwaka kame bino no.” 22Kakame do Rubanga otieko yamo kede Aburaam, Rubanga oko ot oweke.

23Di do ceng nono Aburaam oko tero wode Isimael karacel kede ipasoi dedede kame oudo konywalo i ode, kiton kame oudo ewilo awila kede sente mere, etero cuo dedede kame oudo tie i ode, di en eko kepo delkom gi me cuo bala kame oudo Rubanga owaco ne. 24Aburaam oudo do oromo mwakini ot kanyangon kiwie kanyangon (99) i kare kame bin kokepo kede delkome me cuo. 25Wode Isimael da oudo oromo mwakini tomon kiwie adek i kare kame bin kokepo kede delkome me cuo. 26Bin oko kepo Aburaam kede wode Isimael i ceng nono, 27karacel kede cuo dedede kame oudo tie i ode, ipasoi kame oudo konywalo i ode kede kame oudo kowilo awila kede sente kibut ngakumbor, gida bin oko kepo gi karacel kede en.

Baibuli I Leb Kumam

© 2013 Bible Society of Uganda

More Info | Version Index