Foirm chuardtha

Genesis 26

Isaac-aam Gerar-ami Uitallra

1Tua-llu piitnaq tamaani nunami tut'uq, alla ciuqvaarni Abraham-aam-llu nalliini pillrunrilnguq. Isaac-aam ullagaa Abimelech-aaq anga­yu­qaul­ria Philistine-ani Gerar-ami. 2Ataneq alaillruluni Isaac-aamun qanellruluni-llu, “Egypt-aamun ayagyaqunak maani nunami uitasqellemni uitauraa. 3Makumiungu, nayurciqamken atawaqertelluten-llu. Man'a nuna tamalkuan elpenun kinguverpenun-llu tunqataraqa piciurrluku akqutkelqa atavnun Abraham-aamun. 4Kinguveten amllertaarkauvkarciqanka qiliim agyaitun, man'a-llu nuna tamalkuan ellaitnun tunciqaqa; tamarmeng atanruvilget atawaqercecesqeciqut wangnun kinguveten atawaqercetellrucimtun. 5Atawaqerceciiqamken, tua-i-wa Abraham-aam niisngallruanga aturluki-llu alerquutenka pisqutenka-llu.”

6Tua-i Isaac-aaq uitallruuq Gerar-ami. 7Tuani yuut aptaqatni nulirranek kiularai nayagaqniluku. Qanerciigatuq nuliqniluku alingluni tamaani angutnun tuqutnayukluni Rebecca tegunaluku kenegnaqapigcan. 8Tuani Isaac-aaq akaarnun uitallrurrluku angayuqaq Abimelech-aaq egalerkun uyanglluni kiartellermini tangrrak Isaac-aaq Rebecca-llu kenkuurutellragni. 9Abimelech-aam Isaac-aaq aqvavkarluku qanrutaa, “Cuna-wa nulirqeken, ciin qanercit nayagaqniluku?”

Kiugaa, “Umyuarteqngama-wa tuqutnayuklua qanquma nuliqniluku.”

10Abimelech-aam pia, “Ciin waten pisit wangkutnun? Angutet iliita tutegyaraa nulian, elpet-llu pinarqelriarurcecararpekut.” 11Abimelech-aam yuut tamalkuita aarcirturai, “Uum angutem nulirran-llu agturtii tuqucimaarkauguq.”

12Isaac-aaq nauceciiguq tuani nunami, taumi-llu allrakumi quyurciluni yuinarnek tallimataarluki amllenrulrianek nauceciillermini, tua-i-wa Atanrem atawaqercecani. 13Tuakenirnek piluaqertu'rtuq tukuurrluni-llu cakneq. 14Katngaucian qusnginek, kuluvagnek, pistelirluni-llu Philistine-at ciknakaat. 15Taumek imilarait elakat tamalkuita atiin pistain elallrit Abraham-aaq unguvallrani.

16Tua-llu Abimelech-aaq qanertuq Isaac-aamun, “Maaken nunamten̄ek ayii, wangkutni tang pininrurtellriaten.” 17Isaac-aaq-llu ayagtuq, Gerar-am-llu kuignayuani uitaqerluni. 18Ataam elakat elagai elaumallret Abraham-aam nalliini, Philistine-at kevillrit tuqullran kinguani. Isaac-aam-llu acirai nutem atritnek atami aciutellrinek.

19Isaac-aam-llu pistai elagtut allamek elakamek kuignayugmi mengluteng-llu. 20Qusngiliurtet Gerar-ami qanemyuugautait Isaac-aam qusngiliurtai qanerluteng, “Una meq wangkuta pikarput.” Taumek Isaac-aam elakaq aciqii “Nakukuyun.”

21Isaac-aam pistai elagtut allamek elakamek, tauna cali nakukuyutnguuq, taumek aciqii “Inglukun.” 22Nugtarrluni allamun cali elagtuq. Tauna qanernaituq, taumek aciqii “Pivigtulria.” Qanerluni-llu, “Waniwa Agayutem pivingevkaraakut uitallerkamten̄ek nunami, piluaqeraluta yuuciqukut maani.”

23Isaac-aaq-llu tuaken ayagtuq Beersheba-mun. 24Taumi unugmi Atanrem alairvikaa, qanerluni, “Wiinga Agayutkaanga atavet Abraham-aam, alingevkenak nayuramken, atawaqerceciiqamken amllernek kinguvengevkarluten akqutka aturluku Abraham-aamun.” 25Isaac-aaq-llu tuani ekuavililuni ciktaarvikaa Ataneq. Tuani-llu qavartarluni, pistai-llu elagluteng allamek elakamek.

Isaac-aankuk Abimelech-aaq-llu Ellmegnun Picirkamek Taqutellrak

26Abimelech-aaq taiguq Gerar-amek malikluku Ahuzzath-aaq alerquasten̄i, Phicol-aq-llu angayuqrat anguyagtem̄i, tangerrsarturluku Isaac-aaq. 27Isaac-aam aptaa, “Ciin ullagcia eq'uk'ngerpenga, ayagcetellrulua-llu nunavnek?”

28Kiugaat-llu, “Wangkuta nallunrirarput Atanermun nayuucin, umyuartequkut-llu akqut'liyuunarqucirput akunlemten̄i, elpeci wangkuta-llu. Navgumangailngurmek akqesqukut elpenun, 29akngirtengnaqesqevkenata elpeci qaillun pillrunrilucimcetun, ayagtelluci-llu uitacurlagcetevkenaci. Watua-llu elpeci atawaqercecimalriaruuci Atanermek.” 30Tua-i elliin neqkiurai, ellait-llu ner'ut merluteng-llu. 31Unuaquan makcara'arlutek atunem akqut'liuk, Isaac-aam-llu ayagcetai qaillun pivkenaki.

32Taumi ernermi Isaac-aam pistain ullagaat qanrucarturluku elakamek elallermeggnek. Qanertut, “Mermek nalaqutukut.” 33Aciraa-llu “Picirkiurun.” Tuaten nunarpak piluni Beersheba at'ngellruuq.

Esau-m Nunalgutkumanrilnguut Nulirri

34Esau yuinaagnek malrugnek (40) allrakungluni nulirtullruuq Hittite-agnek nasaurluugnek: Judith-aamek Beeri-m panianek, Basemath-aamek-llu Elon-aam panianek. 35Taukuk cakneq uitacurlagcetakek Isaac-aankuk Rebecca-llu.

Yupik Bible

Yupik Bible © 2012 American Bible Society

More Info | Version Index