Foirm chuardtha

Exodus 11

Moses-aam Qanrutkaa Tuqullerkaat Yung'eqarraarutet

1Tua-llu Ataneq qanertuq Moses-aamun, “Ataucimek cali anucimirqecetaarutmek piciqua Egypt-aam angayuqranun yuinun-llu. Taum kinguakun ayagceciiqaaci, ayagceskunici-llu kasemluci ayagceciiqaaci. 2Watua qanruski Israel-aat kaigasqelluki Egypt-aarmiunek qerrirlinek suulutaanek-llu kenugutnek.” 3Atanrem-llu Egypt-aarmiunun niisngavkarai Israel-aat. Tua-i-wa una Moses-aaq takarnarqelriarurcami Pharaoh-m pistaini yugni-llu.

4Moses-aaq-llu qanertuq Pharaoh-mun, “Ataneq waten qanertuq, ‘Unuum qukallran nalliini pekciiqua tamalkuan Egypt-aami. 5Tamarmeng-llu yung'eqarraarutet, angutet tuquciqut, Pharaoh-m qetunraanek ayagluteng, atanruviim aqumllerani aqumgalriim kinguvanertaqestekaanek, yaavet teguam, mukaarkanek itumcistem, qetunraanun. Kuluviit-llu cali irniqarraarutait angucalut tuquciqut. 6Neplilriarurciiquq Egypt-aaq qialrianek, ciungani tuaten pitaksailngurmek kinguani-llu tuaten pitanqiggngailngurmek. 7Tau͡gaam qimugtem atauciunge'rmi qilugngaitaa Israel-aam yua, wall'u ungungssiutii. Nutaan Egypt-aarmiuni elpeci, nallunrirciqerci wangnun allakarluki nakmikumaciat Israel-aam yui.’” 8Moses-aaq nangneqliuluku qanertuq, “Tamarmeng atanerruaci wangnun tailuteng palurrluteng kaigavikeciqaatnga waten, ‘Yut'en malikluki maaken ayii.’ Nutaan-llu wiinga ayagciqua.” Cakneq tua-i qenerrluni Moses-aam Pharaoh unitaa.

9Ataneq-llu qanellruuq Moses-aamun, “Pharaoh umyuamikun asvaiqurciquq niicugniyuumiinak, amllernek irr'inarqelrialisqellua Egypt-aami.” 10Tua-i Moses-aankuk Aaron-aaq-llu makunek irr'inarqelrianek calillruuk Pharaoh-m ciuqerrani, tau͡gaam Atanrem Pharaoh umyugaakun asvaiqurcetaa, elliin-llu Pharaoh-m ayagcecugpek'naki Israel-aam yui nunaminek.

Yupik Bible

Yupik Bible © 2012 American Bible Society

More Info | Version Index