Foirm chuardtha

Sir 26

Furuɲuman tigi ka dagamu

1Musoɲuman cɛɛ dagamunin lo,

a sii be jaɲa kosɔbɛ.

2Musoɲuman cɛɛ be nisɔndiya,

ale barika la, a be hɛrɛ la a sii bɛɛ la.

3Musoɲuman be di le,

Matigi le b'a di a ɲasiranbagaw ma.

4O cɛɛ sugu mana kɛ fɛntigi ye,

walima fantan wo,

o te foyi ye, a nisɔndiyanin be.

A ɲada ka di koo bɛɛ la.

Musokolon ka koo

5Koo saba dɔ be yen minw be ne dusu cɛn,

a naaninan be ne siran kosɔbɛ.

O ye, jama ka dogodogokuma fɔ ye,

ni jama lajɛnni,

ani mɔgɔ tɔgɔ cɛnko,

o ye koo ye minw ka jugu ni saya ye.

6Nga, tɔɔrɔ min ka jugu kosɔbɛ,

o ye muso min b'a sinamuso keliya,

a daa fana ka jugu.

7Musojugu ni sɛnɛkɛmisi kanlalɔgɔ lacogojugu bɛɛ ye kelen ye.

A mara be i ko bunteni minɛ.

8Muso dɔrɔtɔ be ɲagaminiba kɛ,

a te se k'a lɛbuyɔrɔ dogo fewu.

9Musokolon be lɔn a filɛlikɛ cogo fɛ,

a ɲasi cogo yɛrɛ b'a yira.

10N'i be sunguru yɛrɛminɛbali gɛrɛfɛ,

e k'i yɛrɛ kɔlɔsi kosɔbɛ.

N'o tɛ, n'a ye sababu sɔrɔ,

a be fɛrɛ i la.

11I yɛrɛ kɔlɔsi a filɛlikɛ cogojugu la,

e ɲagamiko kana bali i la.

12Taamabaga minnɔgɔtɔ be sɔn jii fɔlɔ sɔrɔta la cogo min na,

o cogo kelen na,

a be sɔn ka la bɛɛ kɔrɔ,

a ka biɲɛforoko daa be yɛlɛ ka biɲɛ sifa bɛɛ kunbɛn.

Musoɲuman tanu

13Muso ka cɛɲa b'a cɛɛ nisɔndiya,

a ka kɛwaliɲuman b'a cɛɛ fari foni.

14Muso min ka kuma man ca,

o ye Matigi ka dita ye.

Mɔgɔ min ladila ka ɲa,

ale ɲɔgɔn te yen fewu.

15Muso hakilitigi ɲɔgɔn te yen fewu.

Min t'a daa don waliko la,

ale ɲɔgɔn te yen.

16Tile wilitɔ be cogo min na sankolo la,

musoɲuman be ten a ka gwaa labɛnkoɲuman kɔnɔ.

17Matigi ka fitinɛ be yeelen bɔ cogo min na,

mɔgɔ ɲadaɲuman be ten farikolo labɛnkoɲuman kɔnɔ.

18Tutunan sanulaman minw sigira

jusigilan warigwɛlaman kan,

o be cogo min na,

senkalaɲuman fana be ten sentigɛ kan.

19N deen, banba k'i ka kanbelenya waati kɛnɛya mara.

Kana e fanga cɛn lonanw kosɔn.

20Kongo yaala, ka foroɲuman bɔ,

k'i halala suman dan yen,

k'i jigi la e ka burujuɲuman kan.

21O la, i bena deen minw to i kɔfɛ,

olu bena se k'u yɛrɛ boɲa u buruju kosɔn.

22Muso min b'a yɛrɛ feere,

ale ni kaaro bɛɛ ka kan.

Musofurunin be i ko sangaso,

a minɛbagaw be sa le.

23Musojugu bena kɛ kojugukɛla niyɔrɔ ye,

musoɲuman bena kɛ Ala ɲasiranbaga ta ye.

24Muso malobali kɔni b'a sii kɛ maloya le la.

Muso min be malo,

hali ni a n'a cɛɛ be ɲɔgɔn fɛ,

a b'a yɛrɛ minɛ.

25Muso malobali ni wulu bɛɛ ka kan.

Muso min be maloya,

ale bena siran Matigi ɲa.

26Muso min b'a cɛɛ boɲa,

ale ye hakilitigi ye mɔgɔ bɛɛ fɛ.

Furucɛ dɔgɔyabaga tɔgɔjugu bɔnin be,

a ka yɛrɛboɲa kama.

Musoɲuman cɛɛ dagamunin be,

a sii be jaɲa kosɔbɛ.

27Muso mankantigi min ka kuma ka ca be i ko kɛlɛkɛburu fiyɛkan,

a be bɛɛ bila boli la.

Cɛɛ o cɛɛ b'o bolo kan,

ale b'a sii kɛ mankan ni kɛlɛ le la.

Koo saba minw be digi mɔgɔ la

28Koo fila be yen minw be digi ne la,

sabanan be ne dusu dimi ka tɛmɛ,

o ye:

Ka mɔgɔ ye min ta tun ɲana ka ban,

n'a tilara ka dɛsɛ,

ka hakilitigiw ye ni mɔgɔw be ban

u la k'u dɔgɔya,

ani mɔgɔ min be koɲuman to yen ka hakɛ kɛ.

Matigi be saya juguman le mara o tigi ye.

Jagokɛla filiyɔrɔw

29Sannikɛla ka to filibaliya la tuma o tuma,

o ka gwɛlɛ.

Jagokɛla jalakibali tena to kudayi.

ALA KA KUMA

© 2008 Alliance Biblique du Burkina Faso

More Info | Version Index