Foirm chuardtha

Aba 1

1Ala ye koo min yira kira Abakuki la, o filɛ.

Kira be Ala daali

2Masaba, ne ka kan ka dɛmɛ ɲini i fɛ fɔɔ tuma jumɛn

e ka sɔrɔ ka ne jaabi?

Ne ka kan ka kule ka juguya koo fɔ fɔɔ tuma jumɛn

e ka sɔrɔ k'an kisi?

3Mun na i b'a to ne ɲaa be la tilenbaliyakow kan?

Mun na i be sɔn kojugu ka kɛ i ɲana?

Ne te foyi yera ni benkanni ani fariyakow dama tɛ!

Kɛlɛw be kɛra, bɛnbaliya ka ca.

4O la, sariya te batora tugu,

tilenninya nagasira.

Mɔgɔjugu be see sɔrɔla mɔgɔtilennin kan.

O tuma na, tiɲɛ te fɔ tugu kiti la.

Ala ka jaabili: Babilɔnikaw bena ben Isirayɛlidenw kan

5- Masaba ko:

«Aw ye filɛli kɛ siya wɛrɛ fɛ,

aw ɲaa k'a ye,

ka kabakoya kosɔbɛ!

N bena koo kɛ aw ɲana,

ni mɔgɔ b'o lakali aw ye,

aw tena la o la.

6- Ayiwa, ne bena Babilɔnikaw bila aw la.

O siya nin ka jugu, u ka fari,

u be taga yɔrɔ bɛɛ diɲɛ kɔnɔ

ka mɔgɔw ka yɔrɔw minɛ.

7Siraɲamɔgɔw lo, u be mɔgɔ jaa tigɛ!

Olu yɛrɛ le b'u ka sariyaw sigi,

k'u yɛrɛ boɲa!

8U ka soow ka teli ka tɛmɛ waraninkala kan,

u ka jugu ka tɛmɛ kongowulu kɔngɔtɔlaman kan.

U ka sotigiw be panna ka na,

u ka sotigiw natɔ filɛ ka bɔ fɔɔ yɔrɔjan.

U be leru i ko sɛgɛn jigitɔ a ka dumuni tayɔrɔ.

9U bɛɛ be nana benkanni le kama.

U be filɛli kɛ u ɲafɛ dɔrɔn.

U be jɔɔnw minɛ caaman,

u daa te se ka lɔn!

10U b'u ɲaa don masaw la.

Jamana ɲamɔgɔw te foyi ye u ɲana.

Dugu barikaman te foyi ye u ɲana.

U be yɛlɛyɛlɛnan kɛ o kɔfɛ ka don ka dugu minɛ.

11O kɔ, u be tɛmɛ u ka sira fɛ i ko fɔɲɔba.

Fɛnjuguw lo, u ka fanga le y'u ka Ala ye.»

Kira be Ala daali tugu

12Kabini diɲɛ daminɛ na, e le te Masaba ye wa?

Ne ka Ala, i ka ɲi, i tena sa.

An tangabaga Masaba,

i ye siya nin woloma

ka barika don u la

waasa ka na an ɲaa gwan.

13I tilennin lo, kojugu filɛ ma.

I te se ka benkanni muɲu.

Mun na i do be muɲu janfamɔgɔw kɔrɔ?

Mun na i be je, mɔgɔjuguw be mɔgɔtilenninw halaki?

14I be mɔgɔw kɛ i ko jigɛw,

i ko fɛnmisɛnw, kuntigi te minw fɛ.

15An juguw be mɔgɔw minɛna

i ko jigɛ be minɛ ni dulen ye cogo min na.

U b'u minɛ jɔɔ kɔnɔ,

u b'u cɛ n'u ka jɔmisɛnw ye,

u nisɔn be diya kosɔbɛ!

16U b'u ka jɔɔw sɔn,

u be wusulan jɛni u ka jɔmisɛnw ye.

Bari, olu sababu la,

niyɔrɔ ɲanaman sɔrɔla,

dumuni diyara!

17Yala, a bena to k'a ka jɔɔ yɛlɛma kudayi wa?

Yala, a bena to ka siyaw halaki ka taga n'a te makari wa?

ALA KA KUMA

© 2008 Alliance Biblique du Burkina Faso

More Info | Version Index