Foirm chuardtha

KELUAREN 37

Erbahan Peti Perpadanen

(Kel. 25:10-22)

1Besalel erbahan Peti Perpadanen e i bas kayu jati nari, gedangna 110 sentimeter, belangna 66 sentimeter, ras ganjangna 66 sentimeter. 2Jenari ilapisina arah bas rah arah darat alu emas murni, janah itamakenna bingke emas kelewet. 3Ibahanna empat gelang emas man ingan lanja-lanjana, jenari ileketkenna gelang e i bas nahena empatna, dua gelang sembelah. 4Ibahanna lanja-lanjana i bas kayu jati nari, ilapisina alu emas, 5jenari itamakenna arah lubang gelang e, sada sembelah. 6Ibahanna sada tutupna i bas emas murni nari, gedangna 110 sentimeter, belangna 66 sentimeter. 7Itepana dua mahluk si erkabeng i bas emas nari, 8sada i bas tep-tep ujung tutup peti e. Bage me ibahanna seh maka mahluk si erkabeng e ersada ras tutup peti ndai. 9Mahluk si erkabeng e duana si ala-alan, janah kabengna si ikirbangkenna nutupi peti e.

Erbahan meja persembahen roti

(Kel. 25:23-30)

10Besalel erbahan meja i bas kayu jati nari, gedangna 88 sentimeter, belangna 44 sentimeter, ras ganjangna 66 sentimeter. 11Ilapisina meja e alu emas murni, jenari ibahanna bingke emas kelewet. 12Ibahanna ka bingke kelewet, belangna 7,5 sentimeter, jenari itamakenna ukiren emas i bas bingkena e kerina. 13Ibahanna empat gelang emas man ingan lanja-lanjana jenari itamakenna i bas sukina si empat, petingtang ras nahe meja. 14Gelang ingan leket lanja-lanja guna ngangkat meja e itamaken deherken bingkena. 15Ibahanna lanja-lanjana e i bas kayu jati nari ilapisina alu emas. 16Ibahanna alat-alat guna meja e i bas emas murni nari: piring, cangkir, kendi ingan lau, ras mangkuk si ipake i bas mpersembahken anggur.

Erbahan nahe lampu

(Kel. 25:31-40)

17Besalel erbahan nahe lampu i bas emas murni nari. Tapakna ras tangkena itepana i bas emas nari; bunga-bunga ukirenna, si langa terlak ras si enggo terlak, ersada ibahanna.

18Tupang nahe lampu e lit enem, telu arah kawes, telu arah kemuhen. 19Tep-tep tupang si enem e, lit ka telu bunga ukirenna, ibentuk bagi bunga ketapang si langa terlak ras si enggo terlak. 20Tangke nahe lampu e lit empat bunga ukirenna, ibentuk bagi bunga ketapang si langa terlak ras si enggo terlak. 21I bas bena-bena tep-tep tupang si telu pasang e lit sada bunga si langa terlak. 22Bungana si langa terlak, tupang-tupangna, ras nahe lampu e, itepa ersada kerina i bas emas nari. 23Ibahanna pitu lampu guna nahe lampu e, janah ibahanna jepit-jepitna ras talamna i bas emas murni nari. 24Ipakena telu puluh lima kilo emas murni erbahan nahe lampu e ras kerina alat-alatna.

Erbahan batar-batar ingan nutungi si merim-merim

(Kel. 30:1-5)

25Besalel erbahan sada batar-batar i bas kayu jati nari ingan nutungi si merim-merim. Bentukna empat suki, gedangna 45 sentimeter, belangna pe 45 sentimeter, janah ganjangna 90 sentimeter. Tandukna, i bas empatna, sukina, ersada ibahan ras batar-batar e. 26Arah das ilapisina alu emas murni, bage pe dingdingna empatna ras tandukna, janah itamana ukiren emas kelewet. 27Ibahanna dua gelang emas man ingan lanja-lanjana jenari ileketkenna arah teruh ukirenna e, duana arah samping, gelah banci i je leket lanja-lanjana guna ngangkatsa. 28Ibahanna lanja-lanjana e i bas kayu jati nari jenari ilapisina alu emas.

Erbahan minak penangkuhen ras si merim-merim

(Kel. 30:22-38)

29Besalel pe erbahan minak penangkuhen si badia ras barang tutungen si merim murni, icampur bagi minak wangi.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index