Foirm chuardtha

KELUAREN 36

1Besalel, Oholiap, ras kerina tukang-tukang si enggo ibereken TUHAN kebeluhen ras kepentaren, si meteh kuga erbahanca asa kai si iperluken i bas majekken Kemah e, arus ndahiken kerinana sue ras si enggo iperentahken TUHAN.”

Bangsa Israel maba mbue pemere

2Kenca bage idilo Musa Besalel, Oholiap, ras kerina kalak si beluh si enggo ibereken TUHAN kengasupen ras si nggit nampati, jenari isuruh Musa ia kerina menaken dahin e. 3I bas Musa nari ialoken tukang-tukang e kerina persembahen si enggo ibaba bangsa Israel guna majekken Kemah si Badia e. Tapi bangsa Israel terus maba persembahenna man Musa tep-tep erpagi-pagi. 4-5E maka tukang-tukang si beluh si ndahiken dahin e lawes ngelaporkenca man Musa nina, “Barang si itaruhken kalak si nterem enggo lebih asa si iperluken i bas dahin si man bahanen bagi si enggo iperentahken TUHAN.”

6Perban e isuruh Musa gelah imomoken ku kerina ingan erkemah gelah olanai ise pe mereken sumbangenna guna Kemah si Badia e; e maka lanai ka ibaba bangsa Israel tole. 7Kai si enggo itaruhken ku je lebih asa cukup guna ndungi dahin e kerina.

Erbahan Kemah si Badia

(Kel. 26:1-37)

8Tukang si beluhna kal i bas kalak si erdahin e, ibereken tugas erbahan Kemah Perjumpan. Kemah e ibahanna i bas sepuluh lambar lenen halus nari, si itenun ras wool biru, ungu, ras megara, jenari isulam alu gambar mahluk si erkabeng. 9Tep-tep lambar seri ukurenna, gedangna sepuluh dua meter, belangna dua meter. 10Lima i bas si e nari ijarumina jadi sada bagin, janah bage ka pe ibahanna si lima nari. 11I bas tep-tep bagin si dua ndai ibahanna lubang kancingna i bas uis biru nari i bas tepi uis si arah darat. 12I bas lambar si pemena itamakenna lima puluh lubang kancing i bas pasangen si pemena, jenari lima puluh lubang si cocok ras si e i bas lambar si perpudina kal i bas pasangen si peduaken. 13Ibahanna lima puluh kancing emas guna pedemu si dua bagin e jadi sada.

14Kenca bage ibahanna tarum Kemah e i bas sepuluh sada lambar uis nari si ibahan i bas mbulu kambing nari. 15Kerina e ibahanna seri ukurenna, gedangna supulu telu meter, belangna dua meter. 16Lima i bas si e nari ijarumina jadi sada, janah si enem nari jadi sada ka. 17Itamakenna lima puluh lubang kancing i tepi lambar si perpudina kal i bas pasangen si pemena janah lima puluh lubang kancing ka i tepi bagin si peduaken. 18Ibahanna lima puluh kancing tembaga guna mpersada si dua bagin e, gelah jadi sada tarum. 19Ibahanna dua tarum nari, sada i bas kulit bajar biri-biri nari si icelup megara janah sada nari i bas kulit halus nari, jadi tarumna si arah darat.

20Ibahanna dingdingna pajek i bas kayu jati nari guna Kemah e. 21Tep-tep papan ganjangna empat meter janah belangna enem puluh enem sentimeter, 22janah penna dua, gelah dingding e banci kerina ipersada. Kerina papan e lit penna. 23Arah bagin Selatan ibahanna dua puluh lambar papan, 24ras empat puluh alas pirak jadi alasna arah teruh, dua alas i teruh tep-tep papan guna ngeleketken pen si dua e. 25Arah bagin Utara Kemah e ibahanna dua puluh lambar papan, 26ras empat puluh alas pirak, dua arah teruh tep-tep papan. 27Arah pudi Kemah e, ntah pe arah Barat, ibahanna enem papan, 28ras dua papan i bas sukina. 29Papan suki enda isambungken arah teruh janah ipersada terus ku das. Papan si dua si jadi sukina si dua e ibahan alu cara si enda. 30E maka lit waluh papanna ras sepuluh enem alas pirak, dua i teruh tep-tep papan.

31Ibahanna sepululima beloti si berteng i bas kayu jati nari, lima guna sada dampar rangka Kemah e, 32lima arah dingding samping, lima arah bagin Barat, ntah pe arah pudi. 33Beloti si tengah si berteng e, itamaken i tengah-tengah papan e, ipeberteng i bas ujung Kemah e nari ku ujung si deban. 34Ilapisina papan e alu emas janah itamakenna i je gelang emas jadi ingan leket beloti-beloti si berteng e, si ilapisi ka pe alu emas.

35Ibahanna sada kire-kire i bas lenen halus nari, si itenun ras wool biru, ungu ras megara jenari isulam alu gambar-gambar mahluk si erkabeng. 36Ibahanna empat tiang i bas kayu jati nari ingan kire-kire e sangket, ilapisina alu emas, jenari itamakenna pe sangketenna si ibahan i bas emas nari. Kenca bage ibahanna empat alas pirak ingan tiang-tiang e pajek. 37Man dalan bengket ku bas Kemah e ibahanna sada kire-kire i bas lenen halus nari si itenun ras wool biru, ungu ras megara, jenari ihiasi alu sulamen. 38Guna kire-kire enda ibahanna lima tiang ras sangketenna; ujung tiang ras tulan kire-kire e ilapisina alu emas, janah ibahanna lima alas tembaga guna tiang-tiang e.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index