Foirm chuardtha

Matiu 4

ꞌIa Saetan ꞌA Ohongia Jisas

(Mak 1:12-13; Luk 4:1-13)

1Mana Hiꞌona Maea ꞌa waia Jisas ꞌari dora mangasara doꞌia Saetan ꞌai ohongia. 2ꞌIa Jisas ꞌa aiꞌa ngau suriai hai tangahurui dangi mana hai tangahurui rodo magu hioro. 3Mia Saetan ꞌa boi beia ma oꞌani ꞌinia, “ꞌOnaa iꞌoe garena God, ꞌoi haꞌatee tanaꞌi hau ꞌini marai ahoꞌitaꞌi bredi.”

4Mia Jisas ꞌa oꞌani ꞌinia, “Naꞌi Usu-usu Maea ra usu oꞌani, ‘I sae ꞌa bwaꞌi tahi moi ꞌiniai huai bredi, maꞌata ꞌinia roꞌu i haꞌatee ana God.’ ”+

5Mia Saetan ꞌa waia Jisas ꞌari Jerusalem, ꞌi ꞌomaa nara ꞌunua roꞌu ꞌiniai ꞌomaa maea. ꞌA haꞌa-urasia naꞌi dora ahaaha naꞌi hunganai Ruma Maea ana God 6ma oꞌani ꞌinia, “ꞌOnaa iꞌoe garena God ꞌoi rege auru, ꞌinia ra usua naꞌi Usu-usu Maea oꞌani, ‘ꞌIa God ꞌai haꞌa-taariraaui enjel anaꞌi ꞌanai ꞌaꞌauhiꞌo. Rai dau bwarasiꞌo ꞌiniꞌi rimadaaꞌi mana uwamuꞌi ra bwaꞌi maara ꞌiniꞌi hau.’ ”+

7Mia Jisas ꞌa aramia oꞌani, “Mana Usu-usu Maea ꞌa ꞌunua roꞌu oꞌani, ‘Moi abui haꞌimaania Araha God amoou.’ ”+

8Mia Saetan ꞌa waia Jisas araꞌa naꞌi hunganai hungahunga ahaaha ma haꞌataꞌiniꞌi tanaai mwani kantri hako naꞌi marewana mana totoꞌora adaaꞌi, 9ma oꞌani ꞌinia, “Wai haaꞌi hako tanaꞌo i mwane mareho ꞌini ꞌonaa ꞌoi topiraꞌi ruru tanaau maꞌoi haꞌarahesiau.”

10Mia Jisas ꞌa oꞌani, “ꞌAriwou baaniau Saetan! Ra usua naꞌi Usu-usu Maea oꞌani, ‘Moi haꞌarahesia moi Araha God amoou, me ꞌiia moi namoi tauꞌaro tanaa.’ ”+

11Mia Saetan ꞌa ꞌaritaꞌinia Jisas miraaui enjel rau boi marau ꞌaꞌauhia.

ꞌIa Jisas ꞌA Taraawaꞌa Hauai Tauꞌaro Ana

(Mak 1:14-15; Luk 4:14-15)

12Naꞌi ꞌoha na ꞌia Jisas ꞌa rongoa doꞌia Jon ꞌa awa naꞌi rumanihoꞌo, ꞌa ahoꞌi ꞌari Provensi Galili. 13Maꞌata ꞌa aiꞌa awa naꞌi Nasaret, ꞌa ꞌari na awa naꞌi Kapaniam naꞌi bobonai kae bwera i Galili, naꞌi dorai ano anai burungana Sebiulan mea Naftali. 14ꞌA haua oꞌasi ma toꞌo haꞌa-momoriꞌa i taha na ꞌunua Rarabea Aisaea oꞌani,

15“ꞌA ragoi nei nara aiꞌa Jiu narau awa naꞌi Galili,

naꞌi dora nara ꞌunua roꞌu ꞌiniai ano ana Sebiulan mea Naftali

naꞌi gaarangiai kae bwera i Galili manaꞌi nata batarau ꞌiniai wai Jodan.

16ꞌIraaui sae ꞌisi rau awa naꞌi kuhi,

maꞌata ra reꞌiaꞌa i bewaa.

Rau awa naꞌi mamaru ni mae,

maꞌata i bewaa ꞌai bewaasiraau.”+

17Mia Jisas ꞌa taraawaꞌa haꞌausuriraaui sae. ꞌA oꞌani, “Moi rihosi, na heimarungi ana God na awa naꞌi aro, ꞌa gaarangiꞌa!”

ꞌIa Jisas ꞌA Soiai Hai Sae Ahuahuasi

(Mak 1:16-20; Luk 5:1-11)

18Naꞌi ꞌoha ꞌia Jisas ꞌa hahano naꞌi bobonai kae bwera i Galili, ꞌa ꞌomesiai rua haꞌidoꞌorada, ꞌia Saemon, nata ata ꞌia Pita, mia Andru. Naꞌi ꞌohasi, raru ahuasi ꞌiniai huꞌo, suria ꞌiraruasi raꞌi sae ahu-ahuasi. 19Mia Jisas ꞌa oꞌani, “Murui suriau! ꞌOnaai rauꞌi amuruꞌi iiꞌa naꞌi wai, ꞌa oꞌasi roꞌu, wai haꞌausuriꞌamurua ꞌanai waiꞌi mai sae beiau.” 20Naꞌi mau ꞌohasi, raru nugasiꞌi huꞌo adaruꞌi ma raru suria.

21Mia Jisas ꞌa ꞌariwou ma reꞌia Jems mia Jon naꞌi ora beia amadarua ꞌia Sebedi. Rau orimaꞌiniꞌi huꞌo adaaꞌi ma oꞌani ꞌinirarua, “Murui suriau.” 22Mararu ꞌaritaꞌiniai amadarua beiai ora mararu hano beia Jisas.

Ni Tauꞌaro Ana Jisas Naꞌi Galili

(Luk 6:17-19)

23ꞌIa Jisas ꞌa ꞌari suriꞌi ꞌomaa naꞌi Galili ma haꞌausurirai sae suriꞌi rumani haꞌarahesi adaaꞌi Jiu. ꞌA tarohaꞌinia tanaraaui taroha goro ꞌiniai heimarungi ana God na awa naꞌi aro, ma haꞌagorohiraau ahoꞌi nei na toꞌiraau i mwane daoha heꞌeteꞌi hairiu. 24I tarohana ꞌa ꞌadarara ꞌari suriai mwane dora naꞌi Galili, tari ꞌari naꞌi Provensi Siria. ꞌIraaui sae na toꞌiraau i mwane daoha heꞌeteꞌi hairiu maꞌua ra rongomaataꞌi diꞌu, ra wairaau mai tanaa. Taraꞌi sae ra bwaunira i adaro, ma taraꞌi sae ra manumanuꞌa, ma taraꞌi sae ra mae hakoi uwadi. Maꞌata ꞌia Jisas ꞌa haꞌagorohiraau hako ahoꞌi. 25ꞌE kae ruruha narau hano suria Jisas baaniꞌi mwane dora heꞌeteꞌi hairiu. Taraꞌi nei baaniai Galili, manaꞌi Dekapolis, naꞌi Jerusalem mei Jiudea manaꞌi nata bataraui wai rahai Jodan.

Taroha Goro Mana Usuusu Maea

© Wycliffe Bible Translators, Inc. All rights reserved.

More Info | Version Index