Foirm chuardtha

Galat eyŋ e lɛl 2

Ɛrm ɛsɛl ɛjecʼa ɛgŋ Amani Mamn a eke Pↄl am ↄb a eb

1Sica ekʼakpo lɛw yar ɛc a, mʼɛwl mɛny mʼim Jerusalɛm Barnabas ab; mʼoc Tit yɛjʼab mʼim. 2Mʼɛwl mɛny mʼim aŋke Nyam ɛlu ow e low ↄkm yɛgmʼm eke mi ki kok ɛbɛn. Jerusalɛm yogŋ, luku eke mʼas saw ɛm Nyamel ecʼidr ɛsɛl ab a, mʼotar Amani Mamn a eke mʼam ↄb mʼok agŋ ekʼelm Jwifɛl a e low akr mʼok ɛl. Tasi ɛm a, mʼerurm ekʼɛm e juma eke mʼam kok lel ow eke mi kok lɛgŋ sig ɛm ab ab a, e low kʼél ↄfr ↄfr. 3Ɛtŋ Tit ekʼanŋ ɛm ab, ke el Grɛk iy, ke wɛl ubrm likr es a, wɛl ↄnymʼn lɛc ɛm eke li kʼubr likr es. 4Gbɛkↄ agŋ lisijimɛl ayadŋu ekʼanŋ ɛy ecʼaraŋn a erur eke wɛl kʼubrʼr likr es. Agŋ amua ow anŋ ɛy ɛm es lↄl ɛm, eke kʼotar ɛy akr úw ɛy ecʼewi e sʼel Jesu Krist ɛm a e low any. -Nʼam erur eke si kʼel ol e madu. 5Ɛtŋ sʼɛlum ɛl abusu es wanci kaka, yecʼɛtŋ ke sʼúcu Amani Mamn a e low nɛnyɛmbri nyam a sʼↄny es ↄny eci.

6Gbɛkↄ, Nyamel ecʼidr ɛsɛl ɛgbɛl a ↄↄm im low owr kaka eke mi ki kok. Ɛtŋ ɛm ecʼa, ow elm ɛl ecʼidr ɛsɛl ɛgbɛl eke -lʼeel a elm low tasi ɛm ecʼany af, aŋke Nyam ecʼany af a, agŋ a fɛŋ el kpɛŋ kpɛŋ. 7Kↄ tasi ɛm a, -lʼɛkn nana eke Nyam abulʼm agŋ ekʼelm Jwifɛl a ecʼAmani Mamn e kokoba eke mi kʼↄb, ɛsɛ elel eke lʼabul Piɛr eke kʼↄb ok Jwifɛl ab af. 8Ɛtŋ -lʼiri yɛjʼeke Nyam ɛwʼm agŋ ekʼelm Jwifɛl a ecʼɛrm ɛs, ɛsɛ elel eke lʼɛw Piɛr Jwifɛl ecʼɛrm ɛs ab af. 9Jak, Piɛr lel Jan ab, eke wɛl bʼoc ɛsɛ Nyamel ecʼes ɛwɛl af a, uw any ɛkn eke Nyam anake bibm ɛm abulʼm juma na a; -lʼeb ɛy abu, ɛm lele Barnabas ab, -li yɛgm eke -lʼerur. Sica si dad sʼokarir ɛy fɛŋ eke, ɛy si bʼow sʼim si kok juma agŋ ekʼelm Jwifɛl a ecʼaraŋn, ke ɛl -nʼimn Jwifɛl ɛm eci. 10Low cɛ eke -lʼibrmn ɛy a el, ke sʼↄ́kn Jerusalɛm e Nyamel ab ɛm ecʼↄgbↄru a e low. Ɛtŋ ɛm obi mi kok ow e low ɛrm nyam ɛm.

Pↄl ecʼabr ekʼɛnym Piɛr

11Gbɛkↄ eke Piɛr ow Antiↄs ekʼanŋ Siri wus af a, mʼatar in ab agŋ fɛŋ ecʼany af, aŋke nʼↄny low ↄbr. 12Tasi ɛm a, gbuŋ ke agŋ nyam nyam eke Jak ɛrm a ow a, Piɛr am us abu agŋ lisijimɛl ekʼelm Jwifɛl ab ab. Gbɛkↄ lɛgŋ ekʼagŋ a eke bi dogŋn likr es ubr owi es a ow a, Piɛr ocr sos es ɛtŋ ɛgŋm eke kʼij ob agŋ lisijimɛl ekʼelm Jwifɛl ab ab ij, aŋke nʼↄny agŋ a eke bi dogŋn likr es ubr owi es a e muru. 13Jwifɛl ab ɛm ecʼagŋ lisijimɛl bɛb yɛji am kok ɛnyɛmbri yony yony owi na ɛsɛ Piɛr af, ɛtŋ Barnabas in obi yɛji igb ɛy ɛl ecʼɛnyɛmbri yony yony owi na ɛm. 14Ɛtŋ eke mʼɛkn eke ɛl ecʼes an a kʼelm nyim nyim ke kʼotarm es Amani Mamn e low nɛnyɛmbri nyam ab ab a, agŋ a fɛŋ ecʼany af mi dad Piɛr mʼɛsɛ: «Ŋ ekʼel Jwif a, ir ɛb aŋa ɛsɛ agŋ ekʼelm Jwifɛl ab af ɛtŋ kokm yecʼa eke Jwifɛl ecʼol a dad a. Bla sosiɛm ɛtŋ am erur eke kʼↄny agŋ ekʼelm Jwifɛl a lɛc ɛm ir ɛb ɛsɛ Jwifɛl af ee?»

Jwifɛl lele agŋ ekʼelm Jwifɛl ab e sel ɛŋn Krist e nawrɛ ub ɛm

15Ɛy sʼel Jwifɛl ɛy e mew ɛm, kↄ sʼelm bieku ɛjeci ecʼagŋ ekʼuwm Nyam ecʼol ab any a. 16Gbɛkↄ sʼuw any ekʼɛgŋ ecʼelel eke Nyam bʼocʼr ɛsɛ ɛgŋ nyim nyim af a, anŋ ɛgŋ a ecʼↄmn eke bʼↄny Jesu Krist ɛm a, kↄ ow elm Mois ecʼol a eke li bʼɛlum a sosiɛm. Na sosiɛm anake ɛy yɛjʼeke sʼel Jwifɛl a, sʼub Jesu Krist nawrɛ, yecʼɛtŋ ke lʼúw ɛy any ɛsɛ agŋ nyim nyim af, ɛy ecʼↄmn eke sʼↄny Krist ɛm a eci, ke ow kʼélm eke si kok ol a ecʼów a fɛŋ iy nɛny a eci. Tasi ɛm a, ɛgŋ kaka kʼow elm nyim nyim Nyam ecʼany af eke li kok ol a ecʼów fɛŋ ekʼam dad a iy nɛny yɛji. 17Ɛy, sʼam ↄl eke Nyam kʼoc ɛy ɛsɛ agŋ nyim nyim af Krist sosiɛm. Sica, eke wɛl bʼɛkn ɛy ɛsɛ sikpl ɛsɛl af a, ke ayaf wɛl ki dadr ab ee? Ke Krist sikpl e juma nʼam kok ee? Njaŋ, ow elm ɛbɛn! 18Tasi ɛm a, eke mʼɛwl mɛny mʼim ol a eke mʼigŋ mʼɛlu es ab ɛm, ke ɛm sosi mʼam ↄbr low a. 19Ɛm, ol sosiɛm anake mʼerurm eke mi kʼir ɛb ol ecʼij a. Ɛtŋ ów amua fɛŋ ɛcr ɛbɛn, yecʼɛtŋ ke mʼír ɛb Nyam eci. Ɛm mʼuw olikŋ af Krist ab, 20ɛtŋ mʼanŋ owr, gbɛkↄ ow elm ɛm mʼanm owr ij, kↄ Krist anake anŋ owr ɛm ɛm a. Jam aŋa, ɛm ecʼowr anŋ a, mi bi kok ow e low Nyam Jim e nawrɛ e mʼub ab ɛm, in eke lʼerurʼm toŋ ke lʼoc in e sel a lʼirmn ɛm sosiɛm a. 21Mi kʼↄtum mʼocm Nyam e bibm na mʼↄwlm. Tasi ɛm a, ekʼow el ol ɛm ɛgŋ bʼɛcr el nyim nyim ɛs Nyam ecʼany af, ke Krist e luw a, ↄfr ↄfr ana!

Amani Owr

© 1998, Association Ivoirienne pour la traduction de la Bible; Wycliffe Bible Translators, Inc.

More Info | Version Index